Penwythnos Preswyl 2009
Cicio’r Bar – Cynhadledd Merched y Wawr
Mae cryn edrych ymlaen ymysg 300 o aelodau Merched y Wawr wrth iddynt baratoi ac edrych ymlaen at un o uchafbwyntiau calendr y mudiad sef y Penwythnos Preswyl a fydd yn cael ei gynnal eleni yn y Brifysgol yn Aberystwyth.
Bydd y penwythnos yn cychwyn ar brynhawn Gwener Medi 11eg ble fydd cyfle i’r aelodau fynd ar daith dywysiedig o amgylch y Llyfrgell Genedlaethol neu fwynhau siopa yn y dre.
Yna bydd hwyl a digon o chwerthin wrth i bawb ymgynnyll i gael swper a noson yng nghwmni Dawnswyr Talog, Rosfa’r Consuriwr a Chwmni Drama’r Cudyll Coch.
Mae yna amrywiaeth o ddarlithoedd wedi eu trefnu ar gyfer fore Sadwrn, a chyfle I glywed a ydi diemwntiau wirioneddol am byth? A hynt a helynt daearyddiaeth Cymru ac yna cyflwyniad am Arad Goch. Hefyd ceir y cyfle i glywed am gasgliadau Merched yn y Llyfrgell Genedlaethol gan y llyfrgellydd Andrew Green. Bydd cyfle i fynd ar wibdaith Trên Bach i Bontarfynach neu taith i weld y Barcutiaid yn Bwlch Nant yr Arian, taith gerdded ar hyd y prom i ‘Gicio’r Bar’ neu ymweld ag Arad Goch. A chyngerdd i gloi yng nghwmni Côr ABC a chyfle i glywed ‘Atgof y Ser’.
Yn ol yr arfer bydd gwasanaeth foreuol ar y Sul yng nghwmni Dana Edwards (Ffagl Gobaith), a bydd Luned Jones o Oxfam Cymru yn cloi y casgliad ‘Bras’ ac i ddilyn hyn cawn wybod beth yw'r prosiect a chynlluniau ar gyfer 2009/10. I grynhoi’r cyfarfod bydd Beti a’i Phobl yn holi Lowri Davies (artist Cerameg), ac yna cawn eistedd yn nol i wrando ar gyflwyniad gan Kathy Gittins, cyn mwynhau pryd a ffarwelio.
Dywedodd Tegwen Morris Cyfarwyddwraig Merched y Wawr: ‘Mae wedi bod yn waith caled dros y misoedd diwethaf yn paratoi ond mae’n braf cynnal y Penwythnos ar fy stepen drws yma yn Aberystwyth ac rwyf yn edrych ymlaen i groesawu pawb o bob cwr o Gymru i’r ardal fendigedig hon.
"Ers mis Medi diwethaf yn Llambed ble lansiwyd yr ymgyrch i gasglu ‘Bras’ i Oxfam gwaith pleserus iawn fydd crynhoi’r fenter yng nghwmni Luned Jones ac yr ydym wedi croesi y 14,000 erbyn hyn! Yna cawn yrru ymlaen i ddatgelu’r cynlluniau ar gyfer y flwyddyn nesaf," ychwanegodd.
**diwedd**
Am fwy o fanylion cysylltwch a swyddfa Merched y Wawr ar 01970 611 661 neu Tegwen Morris ar 07980 504374
~Cyfle i dynnu lluniau neu ddarlledu o’r digwyddiad.