Croeso i Rysait y Mis!
Cofiwch.... os oes gennych chi ryseit arbennig yr hoffech ei rannu gyda gweddill aelodau a ffrindiau'r Mudiad, danfonwch ef i'r Swyddfa neu ar e-bost, ac efallai mae eich ryseit CHI fydd ryseit y mis y tro nesaf!
RYSAIT MIS CHWEFROR
BRISGED CIG EIDION GYDA THATWS A NIONOD
CYNHWYSION
2kg brisged ffres (heb halen) wedi’i rolio
3 ewin garlleg
teim – llond dwrn
olew olewydd
pupur a halen
1.25kg o datws wedi eu torri yn ddarnau mawr
400g nionod bach neu sialóts
DULL
Cynhesu’r popty i 200°C/Nwy6.
Rhoi'r cig mewn tun rhostio mawr.
Stwffio'r garlleg a’r teim tu mewn ac oddi tano.
Rhwbio 2-3 llond llwy fwrdd o olew olewydd i mewn i’r cig ac ychwanegu papur a halen.
Rhoi'r cig yn y popty am 20-30 munud, yna ei dynnu allan a throi gwres y popty i lawr i 130°C/Nwy ½.
Gorchuddio'r cig â ffoil a’i roi yn ôl yn y popty am 4 awr. Dylai fod yn dyner erbyn hyn, bastio â’r sudd gan ychwanegu’r tatws a’r nionod.
Troi'r gwres i 170°C/Nwy 3 a choginio heb gaead am awr arall.
Gweini'r cig mewn tafelli tew gyda’r tatws, nionod a’r sudd blasus.
Rysáit gan Gwen Môn Holt o Gangen Bro Radyr.
Mae’r saig yma yn hynod o flasus. Cawsom ail bryd gyda’r cig oer ac roedd blas y garlleg wedi mynd drwyddo – mwynheais ef gystal â’r cig poeth! Awgrymwn roi’r tatws i mewn am fwy nag awr ar ddiwedd y coginio ond hwyrach ‘mod i wedi eu torri yn rhy fawr.
Ann Jones
RYSAIT MIS IONAWR
TEISEN BINAFAL
CYNHWYSION
8 owns blawd codi
6 owns siwgr brown tywyll (muscovado)
4 owns menyn
12 owns ffrwythau cymysg
4 owns ceirios
2 wy
Tun bach pinafal wedi’u chwalu
DULL
Rhowch y cynhwysion, ar wahân i’r wyau a’r blawd, mewn sosban ar wres cymedrol. Dod â nhw i’r berw ac wedyn eu gadael i oeri. Ychwanegwch yr wyau wedi’u curo ac, yn olaf, ychwanegwch y blawd. Ffwrn 150°C/300°F/Nwy 2 am tua awr a thri chwarter. Gellir dyblu’r cynhwysion ar gyfer cacen fawr – achlysur arbennig.
Marian Williams, Cangen Llanddarog
Mae’r deisen yma yn gwella o’i chadw rhai dyddiau cyn ei thorri.
Ann Jones
RYSAIT MIS RHAGFYR
Tryffls Nadolig
Cynhwysion
3 owns o fisgedi plaen wedi malu
2 lwy fwrdd o geirios glacé wedi malu yn fân
2 lwy fwrdd o gnau collen wedi malu yn fân
2 lwy fwrdd o almonau wedi malu
2 lwy fwrdd o resins wedi malu yn fân
1 llwy fwrdd o frandi
Diferyn rhinflas almon
2 owns o fenyn
6 owns o siocled plaen tywyll
Vermicelli siocled
2 lwy fwrdd o hufen dwbl
Dull
Toddwch y menyn a’r siocled mewn bowlen.
Defnyddiwch bowlen arall i gymysgu’r bisgedi, ceirios, cnau collen, almonau wedi eu malu, rhesins, brandi a’r rhinflas gyda’i gilydd.
Ychwanegwch y menyn, siocled a’r hufen i’r fowlen a chymysgwch yn dda.
Gadewch i sefyll mewn oergell i oeri. Rholiwch yn beli bach ac yna eu rholio yn y vermicelli.
RYSAIT MIS TACHWEDD
CINIO FFWRN
CYNHWYSION
600g / 1½ pwys o facwn
6 winwn / nionyn
6 moronen
2 genhinen
8 taten – y llysiau i gyd wedi eu plicio a’u tafellu
DULL
Rhoi haenen o facwn ar waelod tun neu gaserol fawr
Rhoi haenen o winwns drosto, yna haenen o foron, cennin a thatws.
Ail wneud y broses eto gan orffen gyda haenen o datws.
Gorchuddio â ffoil neu gaead a’i roi yn y ffwrn ar wrês o 150ºC Nwy 4 am tua 4 awr
Daeth y rysêt yma gan Megan Richards o Felin Fach. ‘Doedd Megan ddim yn dweud
faint fyddai’r rysêt yma yn ei fwydo. Mae llysiau, wrth gwrs, yn amrywio mewn
maint. Buaswn yn amcanu y byddai cymaint â hyn o facwn yn bwydo 4-6 o bobl.
Defnyddiais i 6 tafell o facwn, 1 nionyn, dwy foronen, 1 genhinen a 3 taten ar gyfer
3 person. Ychwanegais ddarn o rwdan hefyd a toddi 1 ciwb isgell ar gyfer porc mewn
tua 250ml o ddŵr a’i dywallt dros y cynhwysion cyn eu rhoi yn y ffwrn. ‘Roedd yn
saig hawdd i’w pharatoi.
ac yn flasus iawn.
Ann Jones
RYSAIT MIS HYDREF
COWBOI Y CARNEDDAU
CYNHWYSION (digon i dri o bobl)
3 stribed o gig bol mochyn gweddol o faint
1 nionyn heb fod yn rhy fawr
1 nionyn coch bychan
tun bychan o ffa pob
tun bychan o ffa gwynion (butter beans)
tun bychan o domatos
1 llond y tun tomatos gwag o ddŵr
llwy fwrdd o piwri tomato
2 gewyn garlleg
½ llwy dê turmeric
½ llwy dê paprika
pupur cayenne i flasu
pupur du a halen i flasu
DULL
1. Torri y cig yn giwbiau a’r nionod yn ddarnau mawr. Ffrïo y cig a’r nionod nes maent yn dechrau brownio. (Nid oes angen ychwanegu saim at badell “non stick” a dim ond y mymryn lleiaf at badell gyffredin.
2. Tywallt yr holl gynhwysion i gaserôl fawr. Ychwanegu dŵr fel bo’r hylif yn gorchuddio’r cynhwysion (gellir ychwanegu dŵr yn ystod y coginio os yw’n sychu).
3. Rhoi y caserôl yn y popty am dair awr ar wrês o tua 160ºC (Nwy5) gan gadw golwg i sicrhau nad yw’n sychu a rhoi tro iddo yn achlysurol.
Sylw yr aelod a anfonodd y rysêt i mewn oedd ei fod yn rhâd, di-lol a hyfryd efo bara ffres neu datws pôb.
Gallaf ategu hyn! ‘Roedd pawb yn ein ty ni wedi ei fwynhau. Fe’i rhoddais yn y popty cyn mynd allan un bore gan roi cyfarwyddiadau i’r gŵr i sicrhau nad oedd yn sychu ac i roi’r popty i ffwrdd ar ôl 3 awr. Pan gyrhaeddais yn ôl ‘roedd y teirawr yn dod i ben. Gweiniais datws wedi eu pobi yn eu crwyn gyda;r saig a broccoli i roi lliw ychwanegol i’r pryd.
Ann Jones
RYSAIT MIS MEDI
ROULADE SELERIAC A CHAWS GLAS(Digon i chwech)
CYNHWYSION
15g/½ owns/llwy fwrdd menyn
225g/8 owns pigoglys wedi’i goginio a’i dorri’n fân
150ml/¼ peint/2-3 cwpan hufen sengl
4 wy wedi’u gwahanu
15g/½ owns caws parmesan wedi’i ratio
Pinsiad o nytmeg
Pupur a halen
LLENWAD
225g/8 owns seleriac
Sudd lemwn
75g/3 owns caws St. Agus
115g/4 owns/½ cwpanaid fromage frais plaen
Pupur du
DULL
Cynhesu’r popty i 200°C/400°F/Nwy 6. Leiniwch dun crasu rholen jam gyda phapur gwrth saim.
Toddwch y menyn mewn sosban ac ychwanegwch y pigoglys. Coginiwch yn ysgafn hyd nes bo’r hylif wedi diflannu, gan ei droi’n achlysurol. Symudwch y sosban oddi ar y gwres a chymysgwch yr hufen, melynwy, caws parmesan, nytmeg, pupur a halen.
Curwch y gwynnwy i ffurfio ewyn swmpus, trosglwyddwch yn araf i gymysgedd y pigoglys ac, yna, arllwys o’r tun crasu a baratowyd eisoes. Taenwch y gymysgedd yn llyfn i’r tun, defnyddiwch gyllell balet i’w wasgaru’n wastad.
Pobwch yn y ffwrn am 10-15 munud nes bo’r rhôl yn soled i’w gyffwrdd ac wedi newid ei liw rhyw fymryn. Yn ofalus tynnwch o’r tun a’i roi ar bapur gwrth saim neu bobi. Roliwch â’r papur tu mewn a gadewch i oeri am ychydig.
I wneud y llenwad, pliciwch a gratiwch y seleriac mewn powlen a thaenwch y sudd lemwn drosto. Cyfunwch y caws glas a’r fromage frais, cymysgwch â’r seleriac, ychwanegwch ychydig bupur du. Dadroliwch y rhôl, gorchuddiwch â’r llenwad, rholiwch unwaith eto. Gweinwch yn syth neu gorchuddiwch yn ysgafn a’i roi o’r neilltu i oeri.
Margaret Morgan
Cangen Felin-fach
RYSAIT MIS AWST
Ffowlyn yr Haf
Cynhwysion
1¼ pwys o gyw iâr wedi ei goginio
¼ pwys o rawnwin gwyrdd (wedi eu haneru)
Tun pinafal (420 gram) wedi ei dorri’n ddarnau bach
Tun o orenau bach 312 gram
¾ cwpan o mayonnaise
2 lwy de o bowdwr cyri#
½ llwy de o saws soy
Dull
Torri’r cyw iâr yn ddarnau bach
Cymysgu’r mayonnaise, powdwr cyri, a’r saws soy mewn dysgl fawr.
Ychwanegu’r cyw iâr, y pinafal, yr orenau a’r grawnwin gwyrdd a’u cymysgu’n dda.
Gosod yn yr oergell am ychydig cyn ei weini ar wely o letys.
Gweinwch gyda thaten pob neu reis.
RYSAIT MIS GORFFENNAF
Torth De
Cynhwysion
1 llond mwg o siwgr brown meddal
1 llond mwg o ffrwythau sych cymysg
1 llond mwg o ddŵr berw
2 lwy de o bicarb
2 llond mwg o flawd codi
2 wy
Dull
Rhowch y siwgr, y ffrwythau, y dŵr a’r bicarb mewn powlen a’u gadael dros nos. Yn y bore ychwanegwch y blawd a’r wyau a’i gymysgu’n dda.
Irwch dun 2 bwys a’i leinio â phapur gwrthsaim.
rhowch y gymysgedd yn y tun a choginiwch mewn ffwrn wedi ei thwymo ymlaen llaw ar wres 180°C/350°F/Nwy 4/Ffan 160°C.
Rysáit Eirlys Thomas, o lyfr “At Ddant Pawb” a baratowyd gan aelodau Cangen Cwm Rhymni.
RYSAIT MIS MEHEFIN
TEISEN DOFFI
CYNHWYSION
400g/pwys Rice Krispies
200g/8 owns menyn
200g/8 owns toffi
200g/8 owns marshmallows
DULL
1. Toddi’r menyn, toffi a’r marshmallows mewn bowlen ar ben sosban o ddŵr berwedig.
2. Diffodd y gwres.
3. Ychwanegu’r rice krispies a’u cymysgu’n dda.
4. Rhoi’r gymysgedd mewn tun mawr a’i wasgu lawr yn dda.
5. Torri’n sgwariau.
Grace Birt
Cangen Abertawe
O.N. Defnyddiais ddau dun 30 x 10 x 3.3 cm (12 x 7½ x 1½”). Ryseit addas iawn i barti plant. Cefais ddeunaw teisen wedi’u torri’n sgwâr o bob un.
Ann Jones
RYSAIT MIS MAI
CYW IÂR MEWN SAWS BARBECIW
CYNHWYSION
Darnau cyw iâr (cymalau)
2 owns o fenyn
SAWS
Winwn wedi’i falu
Pupur a halen
Llwy de mwstard
Llwy fwrdd sudd lemwn
½ peint dŵr oer
2 lwy fwrdd siwgr brown meddal
1 llwy fwrdd blawd corn
1 llwy de Saws Caerwrangon (Worcester Sauce)
1 llwy fwrdd saws tomato
DULL
Ffrio darnau’r cyw iâr yn y menyn nes eu bod yn frown a’u rhoi mewn caserol. Ffrio’r winwn. Rhowch y pupur, halen, siwgr, blawd corn, mwstard, sawsiau, sudd lemwn mewn basn a’u cymysgu â’r dŵr. Ychwanegwch y gymysgedd at y winwn a’i ferwi. Berwch yn araf am ddwy funud. Arllwyswch y saws dros y cyw iâr a’u coginio am awr mewn ffwrn 350°F.
Mae’r saws yma’n dda gyda phorc hefyd.
C. Jean Jones
Cangen Cylch Teifi
RYSAIT MIS EBRILL
EOG MEWN SAWS OREN
CYNHWYSION
4 ffiled eog
2 owns o fenyn
hanner peint o win gwyn neu isgell pysgod
hanner peint sudd oren
Croen oren wedi gratio
1 llwy fwrdd piwri tomato
1 llwy de siwgr demerara
halen a phupur
1 llwy fwrdd o flawd corn
1 lemwn
DULL
1. Gosod yr eog mewn dysgl, ychwanegu'r gwin, sudd oren a'r menyn wedi ei dorri'n ddarnau.
2. Coginio am 10-15 munud ar dymheredd o 180C / 350F neu nwy 4.
3. Gosod y sudd oren mewn sosban.
4. Cymysgu'r blawd corn gyda ychydig o sudd, cyn ychwanegu'r siwgr a'r piwri tomato.
5. Ychwanegu'r gwin a berwi'r cyfan i wneud y saws.
6. Taenu dros yr eog, a'i weini gyda thatws newydd a salad gwyrdd.
RYSAIT MIS MAWRTH
SAWS AFAL TIPYN YN WAHANOL I’W WEINI Â HWYADEN
(Tip yn hytrach na rysáit)
Gratio croen oren yn fân, fân a’i ychwanegu at yr afal, ynghyd ag ychydig sudd oren ac, yna, rhoi siwgr brown ar ei ben.
Yvonne Lloyd-Jones, Cangen Aber-soch
RYSAIT MIS CHWEFROR
CAWL CENNIN A THATWS
Cynhwysion
2 genhinen wedi sleisio
1 winwnsyn wedi malu
1 owns o fenyn
12 owns o datws wedi malu
1 peint o isgell cyw iâr
Halen a phupur
Ysgytiad o nytmeg
½ peint o hufen
Ychydig o ferw dŵr i garneisio
Dull
Toddwch y menyn mewn sosban a ffriwch y cennin a’r winwnsyn yn ysgafn am 10 munud.
Ychwanegwch y tatws, isgell cyw iâr, y pupur a’r halen, ei fudferwi am 30 munud.
Gogrwch y cawl neu ei rhoi yn yr hylifwr, ac yna ei dywallt yn ôl i’r sosban.
Ail-gynheswch y caŵl yn ofalus.
Ychwanegwch yr hufen at y cawl.
Tywalltwch i ddysgl cawl, ysgeintiwch gydag ychydig o ferw dŵr.
RYSAIT MIS IONAWR
CACEN AFAL DENMARC
Cynhwysion
75g menyn neu fargarin
50g siwgr demerara
225g briwsion bara gwyn
700g afalau coginio
un lemwn – croen a sudd
un llond llwy fwrdd o ddŵr oer
50g siwgr gwyn
(Gallwch ychwanegu ychydig o liw gwyrdd i roi gwell lliw i’r afalau)
Addurn
284 ml hufen dwbl
ychydig siocled wedi ei gratio
Offer
Un ddysgl wydr rhwng 1½-2 beint, neu 5 neu 6 o rai bach.
Padell ffrio a sosban
Dull
Toddwch y margarin neu fenyn yn y badell ffrio a choginio’r briwsion bara a’r siwgr demerara ynddo nes ei fod yn grisp ac wedi lliwio’n frown golau. Gadewch i oeri.
Rhowch yr afalau wedi eu sleisio /tafellu yn y sosban hefo’r sudd lemwn, croen a llond llwy fwrdd o ddŵr. Coginiwch yn ofalus efo’r siwgr gwyn nes ei fod yn feddal. Gadewch i oeri.
Wedi iddo oeri, rhowch haenen o afal ar waelod y ddysgl, yna ychwanegu haen o friwsion bara ac afal bob yn ail yn gorffen hefo haen o friwsion bara.
Gadewch i orffwys yn yr oergell hyd adeg ei weini.
Curwch yr hufen cyn ei roi ar ben y ddysgl, yna ei addurno efo’r siocled wedi ei gratio.
Margaret L Gruffydd
RYSAIT MIS RHAGFYR
Pwdin Nadolig Pelen Eira
Cynhwysion
1 tun 300 gram orennau mandarin
50 gram swltanas
50 gram resin
2 llond llwy fwrdd o sieri
3 owns ceirios coch, gwyrdd a melyn
4 owns menyn neu fargarin
4 owns siwgr eisin
2 owns almon mâl
1 paced o 8 ysbwng treiffl
5 owns hylif o hufen dwbl
Powlen bwdin 1 peint
Dull
Irwch y bowlen yn ysgafn â menyn.
Gwahanwch y sudd oddi wrth yr orennau, a’u cadw ar wahân.
Rhowch y swltanas, y resin, y ceirios, a’r orennau wedi eu torri yn eu hanner mewn powlen hefo dau lond llwy fwrdd o’r sudd oren a’r sieri, a’u gadael i fwydo.
Hufennwch y menyn a’r siwgr. nes ei fod yn olau ac ysgafn. Wedyn ychwanegwch yr almon mâl.
Malwch y teisennau ysbwng yn fân, a’u hychwanegu i’r gymysgedd efo’r orennau, y ceirios, y swltanas, y resin a’r sudd.
Cymysgwch y cwbl yn drwyadl, cyn ei roi yn y bowlen a lefelu’r top.
Gorchuddiwch y ddysgl efo haenen lynu (cling film) a’i roi yn yr oergell dros nos neu am hyd at bedwar diwrnod.
Trowch y pwdin ar blât. Curwch yr hufen dwbl nes ei fod yn drwchus. Gorchuddiwch y pwdin â’r hufen a’i wneud i ymddangos fel pelen eira.
Addurnwch â chelyn.
Margaret L Gruffydd
RYSAIT MIS TACHWEDD
Mŵs Mars
Cynhwysion
3 Bar Mars
1 llwy fwrdd o laeth
10 owns hylif hufen dwbl
1 gwynwy
Dull
Torri’r Mars yn sleisys tenau a’u rhoi mewn powlen gyda’r llaeth a’i gynhesu dros sosban o ddŵr berw sy’n mudferwi.
Troi’r gymysgfa’n araf bob hyn a hyn nes y todda ac yn llyfn.
Oeri am tua 10 munud, gan roi tro i’r gymysgfa weithiau.
Chwipio’r hufen tan mae’n dal ei siâp, wedyn cymysgu llwyaid yn ofalus i’r gymysgfa caramel.
Ychwanegu’r hufen yn raddol fesul llwyaid (llwy fetel) gan ei droi’n ofalus iawn.
Cymysgu’r gwynnwy’n ysgafn a’i ychwanegu at y gymysgfa siocled yn ofalus.
Tywallt i’r bowlen, ei orchuddio a’i rewi am o leiaf ddwy i dair awr cyn ei fwyta.
Addurno â siocled wedi’i ratio.
Dylai fod yn ddigon i tua 6 pherson.
RYSAIT MIS HYDREF
Bara Safri
Cynhwysion
300g (6 owns) blawd codi
pinsiad o bapur cayenne
1 llwy de o halen
1 llwy de o berlysiau cymysg
1 llwy de o bowdr mwstard
3-4 winwnsyn gwanwyn
200g (4owns) o gaws cryf wedi ei dorri’n giwbiau
1 wy mawr
2 llwy fwrdd o laeth
1 daten (tua 6 owns) wedi gratio
Dull
Cynheswch y popty i 190°C/375°F
Rhidyllwch y blawd, halen a phupur i ddysgl fawr
Ychwanegwch y perlysiau, winwns wedi torri’n fach, tatws, mwstard a thua ¾ y caws a’u troi i mewn.
Curwch yr wy a’i droi i mewn ynghyd a digon o laeth i wneud toes meddal.
Pobwch nes yn llym a’i siapio i gylch tua modfedd o drwch.
Rhowch ar dun crasu a’i farcio’n chew darn, neu torrwch yn sgoiau bach gyda thorrwr plaen
Taenellwch weddill y caws drosto a’i grasu am tua 35 munud nes wedi codi ac yn frown golau.
Gellir gwneud y rhain gyda winwns o unrhyw fath, ond os yn defnyddio winwns coch neu Sbaeneg, rhaid eu torri’n fân a meddalu ychydig arnynt yn y badell ffrio.
Mary Thomas, Llanrhaeadr ym Mochnant
RYSAIT MIS MEDI
Pice Bach
Cynhwysion
9 owns- fflŵr codi gwyn
2 owns- fflŵr codi brown
1 owns- sbwng neu flawd corn
6 owns- menyn
5 owns- siwgr mân
2 ½ owns- ffrwyth gorau wedi sychu
2 wy bach
Dull
Torri'r ffrwythau yn weddol fân. (Mae’r syltanaiaid, croen oren, y lemwn a’r pin afal weithiau yn rhy fawr.)
Rhowch un wy cyfan ac un melyn wy mewn powlen, a dechreuwch gymysgu. Weithiau mae’n rhaid rhoi ychydig o’r gwyn hefyd.
Gofal rhag gwneud y gymysgedd yn rhy wlyb ac yn anodd ei rolio.
Paratowch yn ôl yw arfer- fflŵr, wedyn siwgr a ffrwythau, wyau yn olaf.
O dan rif dau ar ffwrn trydan Halogen, gan ddefnyddio padell ffrio gweddol drwchus.
Carol Owen, Cangen Llandeilo.
RYSAIT MIS AWST
Cyw Iâr Mwstard Melys ar Wely o Stwnsh Pannas
Cynhwysion
1 brest cyw iâr heb groen
3 panasen wedi ei thorri
200g o iogwrt plaen
4 llwy fwrdd o farmalêd oren
2 llwy fwrdd o fwstard graenog
2 llwy fwrdd o olew olewydd
2 shibwnsyn wedi eu torri’n fach
Dull
Gosodwch y pannas mewn sosban a’u berwi am 15 munud.
Yn y cyfamser, cynheswch yr olew mewn padell.
Coginiwch y cyw iâr yn y badell, gan ei drosi’n aml i’w selio.
Cymysgwch y mwstard ar marmalêd gyda’i gilydd mewn powlen.
Ychwanegwch y gymysgedd i’r badell gan orchuddio’r frest cyw i â r, a’i goginio’n dda ar wres canolog am tua 10-15 munud.
Wedi i’r pannas ferwi, diferwch y dŵr o’r sosban.
Stwnshwch (mash) y pannas gyda’r iogwrt plaen, gan ychwanegu’r shibwns.
Torrwch y cyw iâr, a’i weini ar stwnsh pannas, ac addurnwch gyda shibwnsyn ar ei ben.
Bethan Llwyd, Chwilog
RYSAIT MIS GORFFENNAF
Mousse Mwyar a Chaws Mascarpone
CYNHWYSION
1 pwys (450g) o fwyar duon
5 owns (140g) o siwgr mân euraidd
2 gwyn wy
9 owns (250g) o gaws Mascarpone
11g o gelatin (1 pecyn)
3 llond llwy fwrdd o ddŵr
I Addurno:
1.42ml o hufen dwbl
4 owns (100g) o fwyar
Dull
Rhowch y mwyar ac 1 llond llwy fwrdd o siwgr mewn sosban a’u twymo yn araf, nes bod y sudd yn dechrau llifo, yna ei fudferwi am 5 munud.
Gwasgwch drwy rhydull i mewn i bowlen a’i adael o’r neilltu i oeri.
Rhowch 3 llond llwy fwrdd o ddŵr mewn cwpan.
Ysgydwch y gelatine drosto a’i adael am 5 munud, yna dodwch y cwpan mewn sosban yn cynnwys ychydig o ddŵr berw, nes bos y gelatine wedi toddi yn llwyr.
Ychwanegwch at y puree mwyar.
Yn y cyfamser rhowch y gwyn wy mewn i bowlen gyda sudd gweddill y siwgr mân.
Rhowch y bowlen dros sosban o ddŵr sydd yn mudferwi. Gwnewch yn siŵr nad yw’r bowlen yn cyffwrdd a’r dŵr.
Curwch gyda chwisg llaw drydan am 3 munud.
Tynnwch y bowlen y bowlen o’r gwres a churwch am 2 funud.
Mewn basin arall cymysgwch y caws mascarpone gyda llwy bren yna cymysgwch y puree i mewn iddo.
Plygwch hanner y meringue i mewn i’r gymysgedd gan ddefnyddio llwy fetel.
Plygwch y gweddill i mewn. Trowch y gymysgedd i fowlen fawr neu 6 o rai bach, a’u rhoi yn yr oergell am 2-3 awr neu dros nos.
Pan yn barod i’w weini curwch yr hufen dwbl yn ysgafn a’i roi ar wyneb y Mouse.
Addurnwch ag ychydig fwyar a dail mint os dymunwch.
RYSAIT MIS MEHEFIN
Tatws a Chennin mewn Caws Pob
225g (8 owns)- tatws bach
225g (8 owns)- cennin wedi sleisio
15g (1/2 owns)- margarin
15g (1/2 owns)- blawd plaen
1 x 5ml (llwy de)- powdr mwstard
150ml (1/4 peint)- llaeth
1 x 2.5ml (4 owns)- caws Cheddar cryf wedi gratio
1 melynwy
Halen a Phupur
Dull
1. Rhowch y tatws, cennin a dau lond llwy fwrdd o ddŵr ac ychydig o halen mewn dysgl addas ar gyfer microdon. Gorchuddiwch a choginio ar UCHEL am 7-8 munud nes bod y llysiau wedi eu coginio. Gadewch iddynt oeri.
2. Curwch y margarin, blawd a mwstard efo’i gilydd ac yna’n raddol, ychwanegu’r llaeth a’r saws Worcester a’i guro mewn.
3. Coginiwch ar UCHEL am tua 2 funud gan ei guro bob rhyw 30 eiliad.
4. Curwch y melynwy a’r caws i mewn.
5. Tywalltwch y dŵr oddi wrth y llysiau a’u rhoi mewn dysgl, taenwch y saws drostynt ac yna eu rhoi dan gril poeth neu bopty nes bod yn frown ar yr wyneb.
Mary Thomas, cangen Llanrhaeadr ym Mochnant, Rhanbarth Maldwyn.
RYSAIT MIS MAI
CACEN SINSIR
CYNHWYSION:
200g – blawd codi
100g – margarin
100g – siwgr
3 llond llwy fwrdd – triog
1 llond llwy de – soda pobi
2 wy
¼ - sbeis cymysg
1 llond llwy de – sinsir mâl
½ - llond cwpan o ddŵr berwedig
DULL:
1. Hufennwch y margarin a’r siwgr
2. Ychwanegwch yr wyau a’r blawd, ac yna’r sinsir a’r sbeis.
3. Toddwch y soda pobi yn y dŵr berwedig, a’i ychwanegi i’r gymysgedd.
4. Trowch â llwy bren.
5. Yn olaf, ychwanegwch y triog, ac yna’i roi mewn tin 2 bwys.
Coginiwch am 30-40 munud, tymheredd 180°C
Grace Williams, Merched y Wawr Y Bermo a’r Cylch
RYSAIT MIS EBRILL
Golwythion Cig Oen (i ddau)
4 ystlys o olwythion cig oen (lamb chops)
1 owns o fenyn
8 owns o fadarch bach (rhai ffres neu dun)
8 owns o domatos tun
1 llwy de o flawd corn
1 llwy fwrdd o sos coch (tomato ketchup)
1 pinsiad o berlysiau cymysg
2 llwy de o saws soy (soy sauce)
½ llwy de o siwgr
Halen a phupur
Dull
Sychwch y golwythion, sesno, a ffriwch yn gyflym mewn olew a menyn nes yn frown. Tynnwch o'r badell.
Cymysgwch y blawd corn gyda'r tomatos, sos coch a'r perlysiau. Gadewch am 10 munud.
Rhowch yn y badell. Ar ôl iddo ferwi, gadewch iddo oeri am un funud. Adiwch y saws soy a'r siwgr. Oerwch am 5 munud.
Rhowch y golwythion nol yn y badell, gorchuddiwch, a gadewch i fudferwi am 15-20 munud.
Mary Bewley (Cangen Brynsiencyn)
RYSAIT MIS MAWRTH
Tiramisu Mefus ac Oren
14 owns (400g)- mefus
1 0wns (25g)- siwgr mân
3 llond llwy fwrdd o liqueur blas oren
1 llond llwy fwrdd o frandi
150ml- sudd oren ffres
9 owns (250g)- caws Mascarpone
1 llond llwy fwrdd o siwgr mân
Ychydig ddiferion o fanila
3 llond llwy fwrdd o liqueur blas oren
150ml- hufen sbwng (sponge fingers)
Dull
Golchwch y mefus. Torrwch 12 owns (350g) yn fân. Cadwch y 2 owns (50g) arall o’r neilltu ar gyfer addurno.
Cymysgwch y mefus â’r 4 cynhwysyn nesaf gyda’i gilydd mewn basin a’u rhoi o’r neilltu am ryw hanner awr.
Mewn basin arall cymysgwch y Mascarpone a gweddill y siwgr mân a 3 llond llwy fwrdd o liqueur gyda’i gilydd.
Curwch yr hufen nes ei fod yn dechrau tewhau (peidiwch â’i guro yn ormodol), a phlygwch i mewn i’r Mascarpone.
Hidlwch y ffrwythau gan ddal y sudd mewn basin.
Trochwch y bysedd sbwng yn yr hylif un ar y tro nes eu bod yn dechrau meddalu.
Rhowch hanner y bysedd sbwng ochr wrth ochr mewn dysgl hirsgwar. Rhowch hanner y mefus drostynt yna gorchuddiwch gyda hanner y cymysgedd Mascarpone. Rhowch haenen arall o’r bysedd sbwng ac yna’r mefus gan orffen gyda’r Mascarpone.
Rhowch yn yr oergell am tua 2 awr.
Pan fyddwch yn barod i’w weini addurnwch gyda’r mefus sydd ar ôl. Gellir ei baratoi ddiwrnod o flaen llaw os mynnir.
Yvonne Lewis. Cangen Glannau Pibwr
RYSAIT MIS CHWEFROR
Pancos
2 wy
Tamaid o ‘Bicarbonate of Soda’
Tamaid o ‘Cream of Tartar’
4 owns o siwgr gwyn
½ peint o laeth
8 owns o fflŵr hunan godi
4 owns o fargarin wedi ei doddi
Dull
Cymysgwch yr wyau, Bicarb a’r Cream of Tartar yn dda.
Ychwanegwch y siwgr a’i guro yn dda gyda chwisg trydan.
Ychwanegwch y llaeth, yna'r fflŵr yn ofalus a’i guro i mewn yn dda.
Ychwanegwch y margarin wedi ei doddi.
Mae modd eu coginio ar blanc trydan.
Byddaf i yn eu coginio drwy roi y planc ar y ‘Rayburn’, ac mae angen tymheredd weddol dwym i’w coginio, rhyw dair munud bob ochr.
Rhaid rhoi rhyw lond llwy bwrdd i wneud un pancogen, yna rhoddaf siwgr ar eu pennau.
Mae hwn yn hen rysáit teuluol.
Aeres James.